මෙවර ලෝක කුසලාන එක්දින ක්රිකට් තරගාවලියට එක්ව සිටින පාකිස්තාන සංචිතයේ ක්රීඩකයින් රැසක් වෛරස් උණ රෝගී තත්ත්වයකට මුහුණ දී සිටිනවා.
ඒ අනුව ඊයේ(17) පැවැති පුහුණුවීම් සදහා ද ක්රීඩකයින් රැසකට සම්බන්ධ වීමට නොහැකි වූ බවයි විදෙස් ක්රීඩා මාධ්ය වාර්තා කර ඇත්තේ.
උණ රෝගයෙන් පෙලෙන අබ්දුල්ලාහ් ශෆික් මේ වන විට ඔහුගේ කාමරයේම නිරෝධායනයට ලක් කර ඇති බව ද සදහන්.
ශහීන් ශාහ් අෆ්රිඩි, සවුද් ශකීල් හා සමාන් ඛාන් ද මෙම වෛරස් රෝගයට ගොදුරු වී තිබෙනවා.
පසුගිය සෙනසුරාදා පාකිස්තාන කණ්ඩායම හා ඉන්දීය කණ්ඩායම අතර තරගය පැවැත්වෙන විට ද උසාමා මීර් උණ රෝගයෙන් පෙළෙමින් සිටි බව සදහන්.
උණ රෝගයෙන් පෙළෙන කිසිදු ක්රීඩකයෙකුට ඩෙංගු රෝග ලක්ෂණ නොමැති බවයි වාර්තා වන්නේ.
පාකිස්තාන කණ්ඩායම මෙවර ලෝක කුසලානය යටතේ ක්රීඩා කරන මීළග තරගය සිකුරාදා ඔස්ට්රේලියාවට එරෙහිව පැවැත්වීමට නියමිතයි.
එම තරගයට අෆ්රිඩිට ක්රීඩා කිරීමට හැකි වනු ඇති බවට අපේක්ෂා කෙරෙනවා.
උණ රෝගයෙන් පෙළුණු ක්රීඩකයින් කිහිප දෙනෙකු මේ වන විට සම්පූර්ණයෙන් සුවය ලබා ඇති බවත්, සුවය ලබමින් සිටින අනෙක් ක්රීඩකයින් වෛද්ය කණ්ඩායමේ අධීක්ෂණය යටතේ පසුවන බවත් පාකිස්තාන ක්රිකට් ආයතනය සදහන් කළා.
මීට පෙර ඉන්දීය ක්රීඩක ෂුබ්මන් ගිල්ට ඩෙංගු රෝගය ආසාදනය වූ අතර, ඒ හේතුවෙන් ඔහුට තරගාවලිය යටතේ ඉන්දියාව ක්රීඩා කළ පළමු තරග දෙක ද ක්රීඩා කිරීමට හැකි වූයේ නැහැ.
