දකුණු අප්රිකා කණ්ඩායම සමග පැවැත්වීමට නියමිත දෙවැනි හා අවසන් ටෙස්ට් ක්රිකට් තරගය සදහා වන ඉන්දීය සංචිතයට මෙතෙක් ටෙස්ට් වරම් දිනා නොමැති අවේශ් ඛාන් කැදවා තිබෙනවා.
ඒ, සෙන්චූරියන්හී දී පැවැති පළමු ටෙස්ට් තරගයෙන් ඉන්දියාව ඉනිමක හා ලකුණු 32 ක පරාජයක් ලැබීමෙන් දිනකට පසුවයි.
වළලුකර ආබාධයක් හේතුවෙන් තරගාවලියෙන් ඉවත් වීමට සිදු වූ මොහමඩ් ෂාමි වෙනුවට අවේශ් ඛාන් මෙලෙස ආදේශ කිරීමටයි පියවර ගෙන ඇත්තේ.
දකුණු අප්රිකාවට එරෙහි එක්දින තරගාවලිය සදහා අවේශ් ඛාන් ඇතුළත්ව සිටි අතර, ඉන්දීය A සංචිතය සමග මේ වන විටත් ඔහු එරට රැදී සිටිනවා.
අද දිනයේ දී Benoni හී දී නිමා වූ ඉන්දීය A කණ්ඩායම හා දකුණු අප්රිකා A කණ්ඩායම අතර පැවැති දෙවැනි සිව්දින තරගයේ දකුණු අප්රිකා පළමු ඉනිමේ දී කඩුලු 5 ක් දවා ගැනීමට අවේශ් ඛාන් සමත් වුණා.
මේ දක්වා පළමු පෙල තරග 39 ක් ක්රීඩා කර ඇති ඔහු දවා ගෙන ඇති කඩුලු ගණන 154 ක්. එක්දින ජාත්යන්තර තරග 8කදී හා 20යි 20 ජාත්යන්තර තරග 19 කදී ඉන්දියාව නියෝජනය කර ඇති අවේශ් ඛාන් එහිදී දවා ගෙන ඇති කඩුලු ගණන 27 ක්.
දෙරට අතර පැවැත්වෙන අවසන් ටෙස්ට් තරගය ජනවාරි 3 වැනිදා කේප් ටවුන් හී දී ආරම්භ වීමට නියමිතයි.
දින තුනක් තුළ දී නිමා වූ පළමු තරගයේ දී ලද අන්ත පරාජය හේතුවෙන් දෙවැනි ටෙස්ට් තරගය සදහා ඉන්දියාවෙන් වෙනස්කම් කිහිපයක් සිදු විය හැකි බවට අපේක්ෂා කෙරෙනවා.
